Saturday, February 12, 2005

Kana Angai Sungai Belalong

Liyana banguni pukol 5.40pagi, melompat ku tarus. Bejanji sama cRyn kan ke Selapon lapas solat subuh. Begaraggas mandi, anak-anak ku suruh ready masuk kereta. Panyap itu ini sudah kan pukol 6.05pagi. Ku ambil bakol picnic ku isi dangan buah pear, cheese bun, raisin bun, crackers and mineral water 5 botol. Tekanang ku lagi cheese cake durian dalam aisbok, ku ambau Liyana suruh pack cheese cake ani. Nescafe se-thermos amah ku suruh sediakan. Siap kamas bakalan semua, tarus zoom dalam 6.25pagi. On the way Ryn sms Q panjang di border Kuala Lurah sampai 500meter dah. Sadangkan aku baru betolak dari rumah. Aduhai.. habis lah ni tesangkut di sampadan.

Sampai disampadan ku liat panjang sudah kereta bejanjar. Ku jaling jam rah kereta ku sudah pukol 6.45pagi, be-Q lebeh kurang 500meter panjang jua lah. Dalam ati ku lapas tah sudah dorang cRyn ni. Tau-tau bila ku sms dorang baru singan bilboard selamat datang. Alhamdulillah at least inda jua jauh kan kami menguyung. Nasib kami baik inda lama kami be-Q, fasal kaunter dibuka dua. So lajulah sikit di check-point. Lagipun borang kenderaan kami maseh dapat dipakai sampai 25 april 2005. Lebih kurang sejam kami beingsut atu.

Untuk menyeberang ke Temburong terpaksa naik feri. Inda jua ramai orang kan manyabarang, sakajap saja sudah sampai. Mengalas parut di restaurant Hijrah bersama Ryn n family. Kalau kan tau cerita fasal pengambaraan kami yang melintasi Sungai Limbang ani, masuk saja kerumah Dang Ayang, inda payah ku bejabir lagi. Ada ia story asal usul Selapon atu. Sama kali ceritanya ah... bolieh...

Shortcut saja ku, setelah melintasi beberapa buah kampong yang jalannya macam perjalanan kami kan naik ke Gunung Kinabalu atu(teruk lagi lah G.Kinabalu) sampai tah kami ke Kg Selapon ani. Disana ada sudah beberapa buah kereta landing, ada yang sudah beunggun-unggun, menyalai sayap ayam. Bari tis liur. Kami ani bebakal asal ada saja. Maklum berjalan terajun ayam. Tepaksa dua tiga kali mengingol, baru tah permit kami (aku sama anak-anak) keluar dari babahnya. Cukup dengan amaran anak-anak jangan mandi sungai. Doi lillah saaaayang...

Mula-mula tampat kami landing atu, sudah tah ku lompat-lompat meliat aing. Eeeeeeeeeh... siok meliat usul orang mandi-manda atu. Tinjau sana tinjau sini ku meliat suasana keliling. Inda ku dapat mengutarakan dengan kata-kata, betapa cantik nya sungai Selapon atu. Air nya jernih nampak batu sebiji-sebiji. Anak ikan jelas dipandang mata beranang-ranang. Eh.. iski ku kan menyiut. Baru tah ku sadar rupanya musim kemarau ani tah paling lawa pemandangannya. Air sungainya tenang, nada beolak. Tenaaaaang saja. Ehm... ani baru ya... damai.Ingat ku pulang lagi lagu Zainal Abidin 'damai....'

cRyn sama lakinya sibuk mencari tampat lain yang sunyi inda beorang. Aku sama anak-anak sudah over excited kan turun main aing. Sampat ku bejabir sama orang yang picnic disana atu. Rupanya diaorang ani pun dari Bandar haha.. ku fikir tah orang Temburong jua.

Sudah cRyn belurih tempat yang sesuai kan begalau, kami pun menuju ketampat yang disurveynya tadi. Terpaksa menuruni sikit anak bukit. Ku liat macam kabun saja usulnya. Inda mengancam usul suasananya. Lawa lagi tampat yang mula-mula kami landing atu. Tapi batis ku ani gatal jua melangkah tarus kebawah menuju anak sungai. Sudah ku menyeberangi anak sungai damit atu, ya Allah... tarus tah ku melambai laki cRyn, sambil memberi isyarat 'thumb up'. Tapi sikawan atu inda tepakai fasal nada tanah rata. Semuanya batu, payah ia kan mendirikan khemah yang dianggungnya dari atas jalan atu. Riuh ya.. Malas ku kan mikirkan khemah nya atu. Mun sudah hati jatuh cinta meliat viewnya yang lawa atu.

Bila semua sudah anak-anak kami turun menyeberangi anak sungai damit atu, apa lagi begalau lah semua. Banyak anak-anak ikan jua, hayal ku meliat. Inda ku melapas kan peluang menngabadikan flora dan fauna di sekitar sungai Selapon atu. Dalam ku siok-siok mengikutkan ikan bendera( inda ku tau namanya, ikan atu bewarna hitam kuning merah salah bida macam bendera) ani, kedangaran ku cRyn keriak-keriak, ku liat ia ketawa-ketawa sama Liyana. Malas ku mengalinga, tarus ku lagi mengambil gambar nak-anak ikan beranang-ranang ani. Sudah laki cRyn naik, 'eleh.. rugi inda mengambil gambar orang lamas ah. Hijau biru sudah mua'. Hah... tabangang ku. Rupanya ia keriak-keriak atu tadi, kan lamas tia sudah tu... kalau inda ada jua kan di gual canang.. 'seorang wanita di dapati lemas di air sungai Selapon yang cetek' haha. Atu yang mahal nah.. lamas di aing tuhur.. tanang lagi airnya tu..

Di sebelah kiri sungai tempat cRyn kan lamas atu, ada semacam lorong yang dipayungi oleh pokok rendang. Disana airnya mengalir perlahanan sekali. Tumbuh-tumbuhan hijau sungguh menakjubkan mata memandang. Macam landskap yang kana susun saja usul. Makin ku susuri anak sungai atu makin lawa pemandangannya. Ada dua tiga jenis kupu-kupu menyambut ku. Hayal ku seketika meliat keadaan tempat atu. Ya Allah banyaknya ikaaaaan tampat ani. Pelahan-pelahan ku masuk dalam sungai atu, bemacam jenis hidupan dalam sungai sebuting ani. Ada lagi katam tu betapok disebalik batu-batu, ketungkalan kali ia meliat kasut ku yang basar atu. Sudah ku puas mengambil gambar ikan sama katam ani, naik balik ku keatas. Actually ngilu ku seorang-seorang mengikutkan ikan-ikan yang jinak tapi payah kan ditangkap atu. Antah terlintas ku cerita orang tetua-tetua, jangan telampau iski... meliat barang yang luar biasa ani beubaya-ubaya...

Ada lagi satu spesis bunga ku spot sana, buahnya berambut putih macam rambutan. Nampak macam alien saja usulnya. Lain dari yang lain, exotic. Dalam 15minit ku menghayati flora dan fauna atu, keluar tah ku balik dari lorong yang rimbun atu. Sunyi lagi tampat atu, terosorok oleh rimbunan pokok-pokok yang hidup subur. Suasananya redup dan gelap sedikit, disebabkan cahaya matahari dihadang oleh pokok-pokok yang tumbuh subur disekelilingnya.

Ku ambau tah abis diaorang cRyn sama anak-anak, bagi tau tampat yang ku liat atu, lawa banar. Apa lagi sibuk tah sikawan sama anak-anak nya mencari botol kan menyiut ikan-ikan yang beranang bekawan-kawan. Adih... abis pulang ikan ku ani betempiaran oleh bis diaorang.

Pukol 1.30 patang ujan tia membarai, apa lagi laju belusiran kan menyelamatkan diri. Kali kalau inda ujan turun alum lagi kami balik. Siok banar tampat atu. Sikawan seorang atu, inda mau naik-naik ke tambing. Maklum masa ke Belalong sariatu inda ampit begalau. Iatah melapaskan giannya di Selapon ani. Dulur saja tia rasanya.

Hujan labat makin mencurah-curah, landing kami di Sekolah Rendah Selapon bertaduh disana. Sikawan atu membuka durian, makan durian lah kami dihujan labat atu. Mana saja tah mun parut lapar ani bedal saja tia. Kalau kan tau, pemarang dipakainya membuka durian atu baru keluar dari pelastik. Baik jua ada bejual pemarang di Temburong atu. Kalau inda, ada kan diunjar pembuka durian ah.

Taduh ujan sedikit belusir lagi kami turun ke sungai belakang sekolah atu. Teliat ku tumbuhan menumpang arah sepohon pokok yang tinggi, daunnya lawa hijau bekilat, panjang-panjang bantuknya,berjuntai-juntai. Bejalan ku lagi sedikit kebawah, ada lagi satu jenis pokok menumpang ani. Daunnya macam rupa daun simpur. Tapi daunnya atu mendakap arah pokok. Banar tah Selapon ani lawa flora dan fiona nya. Membari kan inda balik.

Sikawan atu mencabur lagi kedalam sungai. Inda mau puas-puas, sampai anak ku Lutfan pun inda mau-mau kan ikut mandi lagi. Aku malas kan ikut mandi. Sibuk ku menghayati tumbuh-tumbuhan hijau yang melata di tebing sungai atu. Ada sejenis rumput tumbuh subur, daun nya keras dan panjang-panjang . Sekali imbas macam pokok ikong kuda. Kali ani tia puas ku melaram dengan video cam sikawan mengabadikan flora dan fauna Selapon ani.

Menyewa rumah persinggahan Haji Moksin di Belalong. Konon kan besalin pakaian disana. Eleh tau jua rahsia hati, sama jua macam sikawan atu. Sampai sana, lagi tia alai-alai kan turun kebawah mandi lagi. Ani baru namanya kana angai aing sungai belalong. Jauh-jauh pun diaga bebalik. Macam orang kana kanai tah pulang. Akan ku jejaki.. langkah mu.. (nya orang utan batu)

Masa atu air sungainya tuhur sekali. Dapat dijalani ke sebarang. Atu kan masa desimber lapas, kami sana atu bari tungkal meliat arus aing nya yang kuat. Ani tenaaaaaang... setenang-tenangnya.. Sibuk sikawan atu turun ke sungai meliat aing. Aku masih manyap-mayap bonet kereta ku yang beselerak dengan tuala basah. Memutik-mutik nindah anak-anak ku yang antah inda ku tau kan mengatakan... bejurit... Dalam ku mengimpunkan baju-bajuan diaorang ani teliat tah ku durian chez kek... adoi... bukan lagi durian chez kek... tempoyak chez kek kali ah... mun bekuhup dalam bonet kereta..

Sudah parut kanyang makan nasi ayam tapau, naik keatas mandi. Dalam 5.30 patang barinut tah kami balik. Sebenarnya dalam ati, inda pulang kan mau balik. Pakal ganya ingau ati kan pasanan babahnya. Kalau inda, bemalam kali disana lagi, melepaskan gian kan mandi sungai. Banar eh Belalong ani bepuaka.. inda mau-mau dilaggau nya kami balik kesana... pulangkan....

1 comment:

Anonymous said...

oiii.. mandai2 ngucap org lamas di air cetek. Bukan nda berabis menghina atu... sudah tah inda menghulurkan bantuan lalai dgn menggambar anak sapat yang bejurit dilungkang blakang rumah atu... Baik jua bukan ia yg kan lamas atu kalau inda tantutah jadi ristaan, isteri lamas akibat tulah. hahaha... in my case dapat jua kan jadi cerita menduga hati sang suami wakaka!!!